الجزء الثاني، قصص رمضان ،الحلقة الرابعة، تكملة قصة سليمان

دة أنا لما اشوفه هعذبه 

لأ ،، واعذبه ليه ده أنا هذبحه واقتله خالص 

= هو مين دة اللي هيدبح !؟

الهدهد !!

= هدهد ..!!!!! لية دة كيوت خالص  عمل أية بس !؟

في يوم من الايام سيدنا سليمان كان بيتابع جيوشه،،

 فلما وصل لجيش الطيور ملقاش الهدهد!!!

سيدنا سليمان استغرب !!!

هو راح فين يعني ،، المفروض يكون هنا في مكانه؟!

فقرر إنه هيعذبه عذاب شديد أو هيذبحه لأنه مستأذنهوش ،،

إلا بقي لو كان الهدهد عنده سبب مقنع لغيابه عنه بدون إذن .. 

فساعتها هيعفي عن عقابه عشان ميكونش ظلمه ..

"وتَفَقَّدَ الطَّيْرَ فَقَالَ مَا لِيَ لا أَرَى الْهُدْهُدَ أَمْ كَانَ مِنَ الْغَائِبِينَ ۩ لأُعَذِّبَنَّهُ عَذَابًا شَدِيدًا أَوْ لَأَذْبَحَنَّهُ أَوْ لَيَأْتِيَنِّي بِسُلْطَانٍ مُّبِينٍ"

وفجأة كله فضل باصص علي السماء !!

الهدهد جه 

 يا ترى هيحصل إيه للهدهد 

الهدهد راح لسيدنا سليمان وقاله :

أنا عرفت معلومات انت متعرفهاش وجايبلكم أخبار غريبة ومافيهاش أي شك أو إشاعات،،

مع إني يعني هدهد صغير ضعيف،،

 وإنت نبي وملك وعندك كل الجنود دي فأنا عندي معلومات خَفِيَت عنك..!

انا كنت في مملكة سبأ ،، ولقيت حاجه غريبه جداااا !!

"فَمَكَثَ غَيْرَ بَعِيدٍ فَقَالَ أَحَطتُ بِمَا لَمْ تُحِطْ بِهِ وَجِئْتُكَ مِن سَبَإٍ بِنَبَإٍ يَقِينٍ"

هو لقي إيه

 قال : لقيت الحاكم إللي بيحكم المملكة امرأة مش رجل،،،!!!!

 وهي غنية جدا وعندها من أسباب القوة والمُلك،، وكرسي العرش بتاعها عظيم جدا،

"إِنِّي وَجَدتُّ امْرَأَةً تَمْلِكُهُمْ وَأُوتِيَتْ مِن كُلِّ شَيْءٍ وَلَهَا عَرْشٌ عَظِيمٌ"

لا بقي معلش انا ست ولازم أرد علي كلام الهدهد دة !!! وأية المشكلة يعني لما واحده تحكم دولة مش واحد !!؟

واحده واحدة كده... 

عمرك شوفتي نبي امرأة !؟

= لأ..

طب عمرك شوفتي رئيس دولة " امرأة " !؟

= برضو ،، لأ

أقولك بقي لية ..

ربنا خلقنا بطبيعة وتكوين وخلق الراجل بطبيعة وتكوين مختلف عننا ..

وكل واحد مننا ليه مهام غير التاني .. 

الستات مثلا رقيقة أوي وعاطفية وحنينة ومشاعرها هي اللي بتتغلب عليها أكتر من عقلها،، 

 إنما الراجل قوي في بدنه وقوي في تحمل الصعاب ،، وبيعرف يتغلب علي عقله ،، بيعرف يقود الجيوش 

وربنا اللي اختصهم بالمزايا دي..

وحتى في شريعة الإسلام، المرأة لا يجوز إنها تتولى الرئاسة أو القضاء

لا معلش بقي بس إحنا أقوياء اوي 

= اه جداااا بقي كمان 

بس قوتنا مختلفه ،، قوتنا في النجاح وانك تعملي كارير لنفسك 

قوتنا في التربيه والحمل والرضاعة والسهر والتعب 

قوتنا في أننا نقدر نعمل مليون حاجه في وقت واحد  وده الراجل ميقدرش أبدا يعمله..!

قوتك في نجاحك لشخصيتك وفي حياتك العملية والعلميه ..

قدرتنا وقوتنا في المكان المناسب اللي ربنا اختصه لينا وميزنا بيه 

ومتنسيش إن الإسلام لم ينتقص ابدا من قدرات المرأة،، بالعكس دة ديننا هو اللي كرم المرأة 

فطبيعي جدا إن الهدهد يستغرب من الموضوع دة..!

بس الهدهد شاف فساد تاني أخطر منه 

الهدهد كان متضايق أوي وقلبه متقطع .. وقال:

أنا لقيتهم بيسجدوا للشمس من دون الله

"وَجَدتُّهَا وَقَوْمَهَا يَسْجُدُونَ لِلشَّمْسِ مِن دُونِ اللَّهِ وَزَيَّنَ لَهُمُ الشَّيْطَانُ أَعْمَالَهُمْ فَصَدَّهُمْ عَنِ السَّبِيلِ فَهُمْ لا يَهْتَدُونَ"

دول مش بيسجدوا لربنا !!

ربنا إللي خلق السحاب ونزل منه الأمطار المستخبية فيها ،،

وشق الأرض وطلع منها النباتات المستخبية جوة الحبوب تحت الأرض بعيد عنا..

كل ده ربنا أخرجه لينا من المخابيء عشان ناكل ونشرب ونشبع ونعيش في أمانه ورزقه الواسع، 

"ألاَّ يَسْجُدُوا لِلَّهِ الَّذِي يُخْرِجُ الْخَبْءَ فِي السَّمَاوَاتِ وَالأَرْضِ وَيَعْلَمُ مَا تُخْفُونَ وَمَا تُعْلِنُونَ"

مملكة سبأ دي كانت آية في الجمال،، 

فيها الأشجار والأنهار وفاكهة ، 

"لَقَدْ كَانَ لِسَبَإٍ فِي مَسْكَنِهِمْ آيَةٌ ۖ جَنَّتَانِ عَن يَمِينٍ وَشِمَالٍ"

بس برغم جمالها دة ..

الهدهد أول ما شاف ربنا بيُعصَى ويُكفَر بيه،، 

نسي كل حاجه ورجع لسيدنا سليمان عشان نبي هيقدر يتصرف ويغير الوضع ده

سيدنا سليمان لما سمع كلام الهدهد قاله :

هنشوف انت صادق فعلا ولاّ بتكذب وبتقول القصة دي عشان تهرب من العقاب

"قالَ سَنَنظُرُ أَصَدَقْتَ أَمْ كُنتَ مِنَ الْكَاذِبِينَ

بس هو ليه قاله كده

إنت لما حد يقولك معلومة إنت متعرفهاش المفروض تستنكرها وتقوله لا مفيش الكلام دة !!!؟

لأ طبعا ،، مينفعش مهما كنت شايف نفسك متعلم ودارس وعارف،،

 والشخص إللي بيقولك المعلومة في وجهة نظرك مالوش أي وزن علمي،،

ماتقولش أنا عمري ما سمعت الكلام ده والكلام ده غلط،، وانت بتفتي وعكاك ..

 وتبدأ بقي تجادل من غير حتى ما تكلف نفسك تدوّر هل كلامه صح ولّا لأ

والموضوع دة حصل مع واحد من العلماء ..

لما سمع عن مسألة شرعية معينة، فقال باستنكار:

 أنا أول مرة أسمع الكلام ده!!!؟ الكلام دة مش صحيح 

فصاحبه قاله: انت جمعت العلم كله

فالراجل اللي صاحب علم قاله : لأ

فصاحبه قاله: فهل جمعت نصفه؟ 

قال : لأ..

فقال له: خلاص! اعتبر المعلومة دي في النصف اللي انت متعرفوش 

وهو اللي طلع كلامه صح مش العالم 

سيدنا سليمان قاله خد رسالتي ووصلها لهم وهنشوف رد فعلهم إيه !!

اذْهَب بِّكِتَابِي هَذَا فَأَلْقِهْ إِلَيْهِمْ ثُمَّ تَوَلَّ عَنْهُمْ فَانظُرْ مَاذَا يَرْجِعُونَ" 

الهدهد أخد رسالة سيدنا سليمان وسافر لمملكة سبأ ورمي الرسالة وطار بعيد وقعد يراقب،

فالملكة فتحت الرساله وقريتها وأمرت باجتماع الوزراء ..

اجتمع الملأ، وقالتلهم:

يا جماعة أنا وقع قدامي رسالة،،

 ولما فتحتها لاقيتها من سليمان الملك المعروف،، 

كاتب فيها: 

بسم الله الرحمن الرحيم ...أدعوكم للإسلام لله رب العالمين، فأسلموا لله وتعالوا منقادين مستسلمين له عز وجل تاركين عبادة الشمس وكل ما أنتم عليه من شرك ومعاصي..!

"قالَتْ يَا أَيُّهَا الْمَلَأُ إِنِّي أُلْقِيَ إِلَيَّ كِتَابٌ كَرِيمٌ إِنَّهُ مِن سُلَيْمَانَ وَإِنَّهُ بِسْمِ اللَّهِ الرَّحْمَنِ الرَّحِيمِ ألاَّ تَعْلُوا عَلَيَّ وَأْتُونِي مُسْلِمِينَ"

فقالت لهم إيه رأيكم في الموضوع

أنا مش هاخد أي قرار غير لما تقولوا رأيكم،.

"قَالَتْ يَا أَيُّهَا الْمَلَأُ أَفْتُونِي فِي أَمْرِي مَا كُنتُ قَاطِعَةً أَمْرًا حَتَّىٰ تَشْهَدُونِ"

فقالولها:

احنا أقوياء وعندنا قوة تحمل وهنقدر نقاتل لو عايزة تعلني الحرب.. 

ولو عايزة السلام معاه وعدم الدخول في حرب فبراحتك برضو...

شوفي إللي انتِ عايزاه واحنا تحت أمرك

"قَالُوا نَحْنُ أُوْلُوا قُوَّةٍ وَأُوْلُوا بَأْسٍ شَدِيدٍ وَالأَمْرُ إِلَيْكِ فَانظُرِي مَاذَا تَأْمُرِينَ"

 فقالتلهم:

بصراحة كده الملوك لما بيدخلوا بلد بيخربوها بالحرب وبيذلّوا حكامها وأشرافها وسادتها،

فخلينا نبعتله هدية كده ونشوف هل هو من طُلّاب الدنيا وبيرضيه الهدايا،،

فلو رضي فخلاص تبقى اتحلت ونعمل معاه معاهدة سلام دائم مقابل الفلوس والهدايا ..! 

ولّا هو مش هتلزمه هديتنا في حاجه ومصمم علي طلبه إنه مش عايز مننا غير الإسلام زي ما بيقول فعلاً 

"قَالَتْ إِنَّ الْمُلُوكَ إِذَا دَخَلُوا قَرْيَةً أَفْسَدُوهَا وَجَعَلُوا أَعِزَّةَ أَهْلِهَا أَذِلَّةً ۖ وَكَذَٰلِكَ يَفْعَلُونَ ۩ وَإِنِّي مُرْسِلَةٌ إِلَيْهِم بِهَدِيَّةٍ فَنَاظِرَةٌ بِمَ يَرْجِعُ الْمُرْسَلُونَ"

طار الهدهد وسبق الرّسل ورجع لسليمان وحكى له إللي شافه هناك وسمعه وقاله اللي هيحصل 

سيدنا سليمان غضب جداااا ،، يا تري بقي اللي هيحصل بينهم !؟؟

.......... يتبع إن شاء الله 

#سيدنا_سليمان 

#قصص_الأنبياء_بالعامية 

#هبةُ_الله