نبي الله شعيب

شوفتي الجديد !؟

= إيه ..

سمعتي عن الناس إللي بتعبد شجرة!

= لا والله أنا سمعت أن فيه بيعبدوا الأصنام ،، يعبدوا كواكب ، قمر ، نجوم ، إنما شجرة هههههه جديدة دي !!

لأ وإيه كمان ،

مش كفاية بيعبدوا شجرة ،، دول بيغشوا الناس في الميزان !!

= يالهوي بيغشوا الناس في الميزان  

اه وكمان بيسرقوا مجهود وتعب غيرهم !!

= لا كدة الموضوع كبير ده انتي تحكيلي حكايتهم بقي !!

 كان في قبيلة اسمها مَديَن،،

أهل مدين دول كانوا ناس كفار ،، وكانوا من أسوأ الناس معاملة ، وكانوا بيعبدوا شجرة " اسمها شجرة الأيكة "..

كان أهل مدين قطّاعين طُرق ..

 بيطلعوا على الطريق ويخوّفوا المسافرين وياخدوا فلوسهم وحاجتهم،،

 كانوا شبه قوم لوط كدة !!

وكانوا في البيع والشراء ، ياخدوا بالزيادة ويدفعوا بالناقص..

" يعني بيبيعوا مثلا القماش ناقص بفلوس زيادة "

لكن لما همَ إللي يشتروا بياخدوا زيادة عن حقهم ..

ودول اللي ربنا قال عنهم في القرآن "ويل للمُطَفّفِين" .

ف لأن ربنا رحيم ومش بيعذب حد ولا يُهلكه إلا لما يبعتله حد يُذكره ويُوعظه ويُنبهه من الغلط إللي بيعمله ، فربنا بعت لهم واحد منهم إسمه " شعيب "..

"وَمَا كُنَّا مُعَذِّبِينَ حَتَّىٰ نَبْعَثَ رَسُولًا"..

شعيب عليه السلام كان زيه زي باقي الأنبياء مش بيعبد صنم أبداً و مكفرش بالله أبداً..

ربنا بعت سيدنا جبريل لسيدنا شعيب وأوحى له إنه هيكون رسول لقومه .

سيدنا شعيب قال لقوم مدين ،إنهم يعبدوا الله وحده. 

ربنا إللي خلقهم وبيرزقهم وبيشفيهم لو تعبوا..

ونصحهم إنهم يوفوا المكيال..

" يعني ميغشوش في الميزان ويبيعوا كل حاجة زي ماهي بسعرها ووزنها "..

 ويرجعوا للناس فلوسهم ، وميخدوش زيادة عن حقهم ..

ورزق ربنا أحسن لهم من إنهم ياخدوا فلوس الناس بالباطل.!

"قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ قَدْ جَاءتْكُمْ بَيِّنَةٌ مِنْ رَبِّكُمْ فَأَوْفُوا الْكَيْلَ وَالْمِيزَانَ وَلَا تَبْخَسُوا النَّاسَ أَشْيَاءهُمْ ولاَ تَعْثَوْا في الأرضِ مُفْسِدِين"..

وقالهم :

ربنا إللي بيرزق و بيبارك في الفلوس،،

لو انتم مشيتم في طريق غلط عشان تجمعوا الفلوس دي ربنا مش هيبارك فيها وهتبقوا فقراء بعد كدة !!

فالحلال فيه بركة حتى لو كان قليل، والحرام هيخلص بسرعة حتى لو كان كتير!!

"بَقِيَّةُ اللَّهِ خَيْرٌ لَكُمْ إِنْ كُنْتُمْ مُؤْمِنِينَ وَمَا أَنَا عَلَيْكُمْ بِحَفِيظٍ"..

سيدنا شعيب قالهم :

أنا بعمل إللي بقولكم عليه ، مش بقولكم على الحاجة وأعمل عكسها،

 أنا كل إللي عايزه هو الإصلاح على أد ما أقدر وأعمل إللي علياّ والتوفيق من عند ربنا..

"وَمَا أُرِيدُ أَنْ أُخَالِفَكُمْ إِلَى مَا أَنْهَاكُمْ عَنْهُ إِنْ أُرِيدُ إِلَّا الْإِصْلَاحَ مَا اسْتَطَعْتُ وَمَا تَوْفِيقِي إِلَّا بِاللَّهِ عَلَيْهِ تَوَكَّلْتُ وَإِلَيْهِ أُنِيبُ"

 قوم شعيب قالوا له:

هي الصلاة إللي إنت بتصليها دي هي إللي أمَرِتك إننا نسيب عبادة شجرة الأَيْكة إللي كان بيعبدها آباؤنا أو نعمل في فلوسنا إللي إحنا عايزينه ..

ده إيه الصبر والبصيرة إللي إنت فيها دي

احنا كنا عارفينك أعقل وأَرشد من كده .!!

"قَالُوا يَاشُعَيْبُ أَصَلَاتُكَ تَأْمُرُكَ أَنْ نَتْرُكَ مَا يَعْبُدُ آبَاؤُنَا أَوْ أَنْ نَفْعَلَ فِي أَمْوَالِنَا مَا نَشَاءُ إِنَّكَ لَأَنْتَ الْحَلِيمُ الرَّشِيدُ "

فقال لهم :

افتكروا نعمة ربنا عليكم وإزاي كنتم مجموعة صغيرة وربنا زوّد في عددكم،،

 اتقوا ربنا إللي خلقكم أنتم وآباؤكم،، 

واستغفروا ربنا وتوبوا ده ربنا رحيم وودود وبيقبل التوبة..

"وَاذْكُرُوا إِذْ كُنْتُمْ قَلِيلًا فَكَثَّرَكُمْ"

"وَاسْتَغْفِرُوا رَبَّكُمْ ثُمَّ تُوبُوا إِلَيْهِ إِنَّ رَبِّي رَحِيمٌ وَدُودٌ"..

فقالوا له:

إنت شكلك اتسحرت،، وحد عملك سحر!!

"قَالُوا إِنَّمَا أَنْتَ مِنَ الْمُسَحَّرِينَ"

وعلي فكرة بقي إحنا مش حابين كلامك ده ولا عايزين نسمعه ومش فاهمين إنت بتقول إيه أساسا .!!

وإنت ضعيف أصلا!!

 ولولا عيلتك كنا حدفناك بالطوب لحد ما نقتلك لإن انت شخصيا مش عزيز علينا في شيء ولا غالي علينا يعني.

"قَالُوا يَاشُعَيْبُ مَا نَفْقَهُ كَثِيرًا مِمَّا تَقُولُ وَإِنَّا لَنَرَاكَ فِينَا ضَعِيفًا وَلَوْلَا رَهْطُكَ لَرَجَمْنَاكَ وَمَا أَنْتَ عَلَيْنَا بِعَزِيزٍ "

سيدنا شعيب كان مستغرب أوي كلامهم !!

فرد عليهم شعيب وقال: 

بقى معقولة عيلتي أعز عندكم من ربنا!؟ 

بقى بتراعوني عشان خايفين من عيلتي ومش خايفين من ربنا!؟

 إنكم بتؤذوا رسوله إللي جايلكم من عند ربنا !؟

"قَالَ يَاقَوْمِ أَرَهْطِي أَعَزُّ عَلَيْكُمْ مِنَ اللَّهِ وَاتَّخَذْتُمُوهُ وَرَاءكُمْ ظِهْرِيًّا إِنَّ رَبِّي بِمَا تَعْمَلُونَ مُحِيطٌ"

طيب..

اصبروا بقى لحد ما ربنا هو إللي يحكم بيني أنا وإللي آمنوا معايا وبينكم..

"وَإِنْ كَانَ طَائِفَةٌ مِنْكُمْ آمَنُوا بِالَّذِي أُرْسِلْتُ بِهِ وَطَائِفَةٌ لَمْ يُؤْمِنُوا فَاصْبِرُوا حَتَّى يَحْكُمَ اللَّهُ بَيْنَنَا وَهُوَ خَيْرُ الْحَاكِمِينَ"

فقالوا له بكل تكِبر وغرور:

يا إما نطردك برة البلد إنت وإللي اتبعوك دول أو ترجعوا عن إللي في دماغكم ده وتكونوا على دينا إحنا!

"قَالَ الْمَلَأُ الَّذِينَ اسْتَكْبَرُوا مِنْ قَوْمِهِ لَنُخْرِجَنَّكَ يَاشُعَيْبُ وَالَّذِينَ آمَنُوا مَعَكَ مِنْ قَرْيَتِنَا أَوْ لَتَعُودُنَّ فِي مِلَّتِنَا"

قال لهم شعيب: 

حتى لو إحنا مش عايزين.

محدش أبداً هيرجع للكفر بعد ما داق حلاوة الإيمان بالله إلا وهو مُكره، 

ده احنا لو رجعنا عن الحق إللي ربنا هدانا ليه يبقى بننكر إنه حق وبنفتري على ربنا الكذب ،.

عايزنا نرجع بعد ما ربنا نجانا من الضلال ده!

"قَالَ أَوَلَوْ كُنَّا كَارِهِينَ قَدِ افْتَرَيْنَا عَلَى اللَّهِ كَذِبًا إِنْ عُدْنَا فِي مِلَّتِكُمْ بَعْدَ إِذْ نَجَّانَا اللَّهُ مِنْهَا"

إحنا مش هنرجع أبدا إلا لو ربنا أراد حاجة تانية هو ملجأنا 

وهو إللي هينصرنا 

"وَمَا يَكُونُ لَنَا أَنْ نَعُودَ فِيهَا إِلَّا أَنْ يَشَاءَ اللَّهُ رَبُّنَا وَسِعَ رَبُّنَا كُلَّ شَيْءٍ عِلْمًا عَلَى اللَّهِ تَوَكَّلْنَا "

ده إيه التسلط بتاع قوم شعيب ده؟

هما كدة يا تبقى معايا وعلى مزاجي يا إما هطردك وهأذيك وهعذبك ، مفيش حرية اختيار خالص!

لكن لما ملاقوش فايدة في شعيب ،قالوا نروح لقومه نسيطر عليهم !!

 فقعدوا يقولوا للمؤمنين لو مشيتم ورا شعيب هتخسروا ، مش هتلاقوا فلوس!!

"وَقَالَ الْمَلَأُ الَّذِينَ كَفَرُوا مِنْ قَوْمِهِ لَئِنِ اتَّبَعْتُمْ شُعَيْبًا إِنَّكُمْ إِذًا لَخَاسِرُونَ "

فشعيب عليه السلام بدأ يخوّفهم ويقولهم متخلوش كرهكم ليا أو لكلامي يخليكم ماتمشوش ورا الحق،، 

لو أسلوبي مش عاجبكم وشايفين إني ضعيف وإن فيه احسن مني في لساني وكلامي،،

 واني لا أستحق النبوة والرسالة إللي ربنا نزلها عليا ، اتبعوا الحق وملكوش دعوة بمين هو اللي بينقل الحق..

ربنا هيسألكم عن الحق إللي جالكم..

مش هتقدروا تقولوا ساعتها أصل أسلوبه كان وحش.

أو تقولوا إشمعنى هو إللي يقولنا كده وهو ضعيف.

يا جماعة اتعظوا باللي حصل قبل كده !

قوم نوح وقوم هود وقوم صالح قالوا نفس كلامكم ،وكانت نهايتهم إيه؟.

.نهاية قوم لوط بالذات مش بعيدة عنكم دى كانت لسه حاصله من قريب !!

"وَيَا قَوْمِ لَا يَجْرِمَنَّكُمْ شِقَاقِي أَنْ يُصِيبَكُمْ مِثْلُ مَا أَصَابَ قَوْمَ نُوحٍ أَوْ قَوْمَ هُودٍ أَوْ قَوْمَ صَالِحٍ وَمَا قَوْمُ لُوطٍ مِنْكُمْ بِبَعِيدٍ "

فقالوا له: 

بص إنت بشر زينا وإحنا شايفينك كذاب !!

"وَمَا أَنْتَ إِلَّا بَشَرٌ مِثْلُنَا وَإِنْ نَظُنُّكَ لَمِنَ الْكَاذِبِينَ "

لو إنت فعلا صادق هات العذاب إللي إنت بتقول عليه ده!!

"فَأَسْقِطْ عَلَيْنَا كِسَفًا مِنَ السَّمَاءِ إِنْ كُنْتَ مِنَ الصَّادِقِينَ"

فقال لهم شعيب عليه السلام :

خلااااص خلصت. لحد كدة !

كل واحد هيخليه زي ماهو بدماغه براحته خالص،

وربنا عالم بأفعالكم .!!

إنتم كملوا إللي بتعملوه وإحنا هنكمل في إللي بنعمله وبكرة تشوفوا مين إللي هيجيله العذاب ومين هو الكذاب، استنوا وأنا مستني معاكم.!!

"وَيَا قَوْمِ اعْمَلُوا عَلَى مَكَانَتِكُمْ إِنِّي عَامِلٌ سَوْفَ تَعْلَمُونَ مَنْ يَأْتِيهِ عَذَابٌ يُخْزِيهِ وَمَنْ هُوَ كَاذِبٌ وَارْتَقِبُوا إِنِّي مَعَكُمْ إِنِّي مَعَكُمْ رَقِيبٌ"

سيدنا شعيب فضل يدعي وقال:

"رَبَّنَا افْتَحْ بَيْنَنَا وَبَيْنَ قَوْمِنَا بِالْحَقِّ وَأَنْتَ خَيْرُ الْفَاتِحِينَ "

وبعد فترة من الوقت ،،

 حصل موجة حر جامدة جداً، ومكنش فيه أي نسمة هوا لمدة سبعة أيام !!

 ومكنش بينفعهم ظل ولا مياة ، فخرجوا من البيوت للصحراء قال يعني يلاقوا طريقة تنجيهم من الحر ده.!

فربنا بعت لهم سحابة فاتجمعوا كلهم تحتها عشان تظللهم من حر الشمس.

وأتاريها الظُّلة إللي فيها عذابهم النهائي !!

"فَكَذَّبُوهُ فَأَخَذَهُمْ عَذَابُ يَوْمِ الظُّلَّةِ إِنَّهُ كَانَ عَذَابَ يَوْمٍ عَظِيمٍ"

فربنا هز الأرض بقوة من تحتهم ، كان زلزال جامد اوي ، وأصوات مرعبة 

"وَأَخَذَتِ الَّذِينَ ظَلَمُوا الصَّيْحَةُ فَأَصْبَحُوا فِي دِيَارِهِمْ جَاثِمِينَ * كَأَنْ لَمْ يَغْنَوْا فِيهَا أَلَا بُعْدًا لِمَدْيَنَ كَمَا بَعِدَتْ ثَمُودُ"

ربنا خلي السحابة دي تمطر الشرر والشهب،،

 وماتوا كلهم موتة بشعة، ووشوشهم مدفوسة في التراب في مشهد كله ذُل وصَغار وإهانة وتعذيب لهم.

وقوم شعيب إيه اللي حصلهم !؟

ربنا نجي سيدنا شعيب والمؤمنين اللي كانوا معاه .

"وَلَمَّا جَاءَ أَمْرُنَا نَجَّيْنَا شُعَيْبًا وَالَّذِينَ آمَنُوا مَعَهُ بِرَحْمَةٍ مِنَّا "

ورجع شعيب عشان يشوف إللي حصل لقومه فقالهم وهو بيعاتبهم:

أنا بلغتكم رسالة ربنا ونصحتكم بس إنتم إللي مسمعتوش الكلام ، فإزاي أزعل على إللي حصل لناس كافرين زيكم، جحدوا نعمة ورحمة ربهم ورفضوها ؟!!

"فَتَوَلَّى عَنْهُمْ وَقَالَ يَاقَوْمِ لَقَدْ أَبْلَغْتُكُمْ رِسَالَاتِ رَبِّي وَنَصَحْتُ لَكُمْ فَكَيْفَ آسَى عَلَى قَوْمٍ كَافِرِينَ"

وهم سمعوه وهما ميتين ؟!

وهم كانوا سامعينه اه على فكرة ، ربنا بيخليهم يسمعوا زيادة في الألم والحسرة والعذاب!!

سيدنا شعيب قالهم ؛:

عرفتم مين الكذاب ، عرفتم مين الخسران.

عرفتم مين إللي كان على حق ومين إللي كان على باطل؟

بس خلاص ندمتم في وقت مينفعش فيه الندم.

"الَّذِينَ كَذَّبُوا شُعَيْبًا كَأَنْ لَمْ يَغْنَوْا فِيهَا الَّذِينَ كَذَّبُوا شُعَيْبًا كَانُوا هُمُ الْخَاسِرِينَ".

ربنا بيعلمنا من قصص الأنبياء عشان منقعش في أخطاء أقوامهم..

فلما حد ينصحك خد نصيحته إنها إشارة ربنا باعتهالك، 

وفكر فيها كويس جدا ، شوف هل النصيحة دي حق ولّا باطل؟ 

هل هتنفعني في صحيفتي لو نفذتها ولّا بالعكس ولّا مالهاش لازمة أصلا ؟

وفي الآخر

النصيحة دي هترضي ربنا فعلا ولا هتزعله مني ..

محوظة :

 أهل مدين دول غير أهل مدين اللي موسى عليه السلام هيروح لهم بعد كده !!

#هبةُ_الله