نبي الله يونس
أسألكم الدعاء لي ولوالدي (أبي وأمي) فضلاً.
Esraa Fayez 
كان فيه نبي اسمه " يونان " ..
= نعم ، نعم هنستهبل !!
استغفر الله العظيم ، طيب بلاش يونان بدل ماتعرفش!
كان فيه نبي إسمه " ذا النون " ..
يووووه !! ، انتي بتقولي أى هبد على فكرة
= طب تصدق بقي مش هقول اسمه اللي ذُكر في القرآن إيه!
بس علي فكرة بقي هو من أسمائه يونان ، وذا النون ، ايه رأيك بقي!
لأ إذا كان بقي الموضوع كده قوليلنا مين هو ذا النون ؟!
كان فيه نبي كريم جداً ، ربنا أرسله لقرية كلها كفار ..
فضل النبي يدعوهم لعبادة ربنا ، وينصحهم ، ويرشدهم إلي الخير ، ويذكرهم بيوم القيامة ، ويخوفهم من النار .
ويحببهم في الجنة ..
طبعا كالعادة بني إسرائيل عملوا ايييييه ..!
كذبوه !!
ومحدش آمن بيه من قومه ..
هى كانت فين القرية دي !؟
كانت قرية " نِينَوَى " في العراق .
فربنا قاله إنه هيرسل عليهم العذاب، لكن النبي غضب جداً على قومه وقالهم :
إن ربنا هيرسل عليهم العذاب بعد ثلاثة أيام ، وساب القرية ومشي .
وقومه غضبوا منه إنه سابهم ومشي بره القرية!
"وَذَا النُّونِ إِذْ ذَهَبَ مُغَاضِبًا "..
إيه ده !!
يعني النبي خرج من القرية قبل ما ربنا يأمره بكده !؟
= بالظبط كده ..!
طب ليه عمل كده !!؟
= لأن الرسل اللي قبله كان ربنا بيأمرهم يخرجوا ويسيبوا القرية ، لأن ربنا هينزل عليهم العذاب ..
فالنبي كان متخيل إنه عادي يعمل كده لإنه نبي وربنا مش هيغضب عليه أو يعاتبه ، أو يضيقها عليه بسبب اللي عمله ده
قبل ما الوحي يجيله ..!
"فَظَنَّ أَنْ لَنْ نَقْدِرَ عَلَيْهِ"..
بعد ما خرج من القرية راح ركب سفينة في البحر،،
وهمّ في الطريق البحر هاج والناس خافت لَيغرقوا،
فقالوا خلاص نخفف الأحمال شوية !
فرموا الأمتعة بتاعتهم في البحر ، بس برضو لسه السفينة تقيلة!
فقالوا مفيش قصادنا حل غير إننا نبدأ نرمي من الناس حد معين!
فعملوا زي قرعة كدن ، فطلع نصيبها مييييين إنه يترمى في البحر
النبي طبعاً ..
" إِذْ أَبَقَ إِلَى الْفُلْكِ الْمَشْحُونِ * فَسَاهَمَ فَكَانَ مِنَ الْمُدْحَضِينَ "
الناس بصوا له شافوا عليه علامات الصلاح..
فقالوا بلاش نرميه خلونا نعمل قرعة تانية أحسن.
وعملوا القرعة مرة ، واتنين ، وثلاثه ..
بس كل مرة يطلع نصيب النبي برضو .
فعرف النبي إن هو المقصود ، وإن دي إشارة من ربنا،،
أهل السفينة رموا النبي فعلاً في البحر.
وبعد ما رموه ، في ساعتها طلع حوت ضخم وفتح فمه وابتلع النبي
في نفس الوقت ده ربنا كان أرسل على قومه العذاب،.
فلما شافوا السحاب شكله مرعب ، وعمال يسود ،
قالوا إن النبي كان صادق وهو ده العذاب اللي جايلنا!
واحنا مفيش قصادنا غير إننا نتوب ونستغفر ونرجع إلى الله عشان يكشف عننا العذاب،،
كانت القرية دى فيها أكتر من مائة ألف واحد .
"وَأَرْسَلْنَاهُ إِلَى مِائَةِ أَلْفٍ أَوْ يَزِيدُونَ "
فضلوا يعيطوا ويستغفروا ربنا عشان يعفي عنهم.
وفضلوا فتره كده لحد ما ربنا رفع عنهم العذاب فعلا..
"فَلَوْلَا كَانَتْ قَرْيَةٌ آمَنَتْ فَنَفَعَهَا إِيمَانُهَا إِلَّا قَوْمَ يُونُسَ لَمَّا آمَنُوا كَشَفْنَا عَنْهُمْ عَذَابَ الْخِزْيِ فِي الْحَيَاةِ الدُّنْيَا "
والنبي كان يعرف اللي حصل مع قومه !؟
= لأ ماكنش يعرف ، ماهو بلعه الحوت بقي ..
وخلاص كده مات !؟
لأ ،،
النبي أول ما فتح عينه لقى نفسه في بطن الحوت.
وازاي الحوت مأكلهوش ؟؟
لأن ربنا أمر الحوت إنه ماياكلوش ولا يكسر عظمه لإنه مش رزقه..!
الحوت بقي كان جميل اوي ..
فضل يطوف ويلف بالنبي في البحر..
فكان النبي بيسمع أصوات تسبيح المخلوقات في الأعماق،،
فبدأ يسبّح معهم. ويقول :
"لَا إِلَهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ"
النبي كان عارف إنه غلط ، وعارف إن ده كان عتاب من ربنا له ، فصبر علي البلاء ..
ميأسش !! وقال خلاص ربنا بينتقم مني !!
لأ فضل يسبح ربنا عشان يرفع عنه البلاء
"فَلَوْلَا أَنَّهُ كَانَ مِنَ الْمُسَبِّحِينَ * لَلَبِثَ فِي بَطْنِهِ إِلَى يَوْمِ يُبْعَثُونَ"
فربنا استجاب و أمر الحوت إنه يطلع النبي من بطنه ويرميه على الساحل،،
"فَاسْتَجَبْنَا لَهُ وَنَجَّيْنَاهُ مِنَ الْغَمِّ وَكَذَلِكَ نُنْجِي الْمُؤْمِنِينَ".
وخرج النبي و جسمه ضعيف جداً.
فربنا أنبت له جنب منه شجرة من يقطين تغطي جسمه ، وكمان كان ورقها بيتاكل بقشرها ومن غير قشرها..
مطبوخة ومش مطبوخة..
وقعد أد إيه في بطن الحوت !؟
يُقال يوم واحد ، ويقال سبع أيام ، ويقال أربعين يوم.،،
طب هو إزاي نبي يغلط معلش !؟
هما مش الانبياء معصومين من الغلط !؟
الأنبياء معصومين من الغلط في تبليغ الوحي سواء غلط متعمد او غير مُتعمّد .
ومعصومين من الكفر ، و معصومين من الكبائر..
لكن مش معصومين من الصغائر ..
و بينزل بعدها علي طول وحي من ربنا بالعتاب.
فبيستغفروا ربنا منها ومش بيرجعوا لها تاني أبداً.
و مش معنى كده إن ده يُنقص حاجة من قَدر الأنبياء دول،
لإن تمام الكمال بيكون حسب النهاية كانت إيه، والعبرة بالخواتيم، والأنبياء حالهم أكمل الأحوال..
ها بقي عرفت النبي ده كان مين !؟
طبعاً ، سيدنا يونس " يونس بن متّى "..
_سيدنا يونس
_هبة الله
المصادر:
تفسير ابن كثير
والطبري
والقرطبي
وابن إسحاق
اللينكات الخاصة بالنشر
