سيدنا شيث وابنه أنوش

سيدنا شيث (ابن سيدنا آدم) 

اية اللي هيحصل بعد ما سيدنا آدم يعرف أن هابيل اتقتل !

سيدنا آدم هيحزن جدا ويزعل اوي هو وستنا حواء ..

سيدنا آدم كان بيحب أوي هابيل لأنه كان إبن صالح ومؤمن ،، وبيسمع كلام سيدنا آدم ،، وبيسمع كلام ربنا 

وكان بيعمل كل حاجة سيدنا آدم علمهاله عن ربنا 

فضل سيدنا آدم زعلان أوي علي موت هابيل ،، 

لحد في يوم من الايام حواء حملت وجابت ولد وبنت في بطن واحدة ..

سيدنا آدم قال إن اكيد ربنا هيعوضه عن هابيل وهيبعتله الولد دة عشان يكون مؤمن وصالح ويسمع كلامه وكلام ربنا 

فسمي الولد ده ايييية ؟!!

 " شيث "

يعني إيه شيث 

شيث يعني هبه الله  يعني عوض من ربنا  يعني هديه جميلة اوي من ربنا 

ربنا بعت شيث لآدم وحواء عشان يعوضهم عن موت هابيل وزعلهم عليه 

شيث كان بيسمع كلام سيدنا آدم وحواء..

فسيدنا آدم فضل يعلم شيث أوامر ربنا 

علمه كل حاجه ربنا علمهاله.،، وقاله علي كل الأسماء اللي ربنا علمها لسيدنا آدم ،،

كان بيعلمه ليه كل حاجة ؟؟

 عشان يعلم كل الناس اللي هتتولد من بعده.

عاش سيدنا آدم سنين كتييييير كتييييير ..

عاش لحد ما شاف أولاده وأولاد أولاده وأولاد أولاد أولاده ..

أية دة !! هو عاش كام سنة !!؟

عاش ألف سنة !!

سيدنا آدم كبر أوي ،، 

خلاص كان قرب يموت ،، فقال " لشيث " انا هوصيك وصيه ولازم تعملها يا شيث ..

قاله ،، 

يا شيث أنا عايزك تعلم الناس الخير وتبعدهم عن الشر

 وتعلم الناس أنهم يحبوا ربنا ويعبدوه ،، ويبعدوا عن الشيطان وميسمعوش كلامه ..!

بس سيدنا آدم حذر شيث من حاجة !!

حذره أنه ميقولش لقابيل أنه هيخلي الناس تعمل الخير وتبعد عن الشيطان ،، 

ليه ميقولش لقابيل ؟؟

عشان قابيل كان حسود ،، وهيقول اشمعني شيث اللي يعلم الناس وأنا لأ !!

وفي يوم من الايام سيدنا آدم تعب أوي ،، وقال لأولاده إنه نفسه في فاكهه الجنة 

أولاده راحوا عشان يطلبوا فاكهه الجنة ،، ف الملايكة قابلتهم ..

قالتلهم ما تريدون وما تطلبون ؟؟

انتوا عايزين أية ؟

أولاد سيدنا آدم قالولهم : إن أبونا تعبان ونفسه في فاكهه الجنة 

ف الملايكة راحت لسيدنا آدم وقعدت حواليه لحد ما سيدنا آدم مات ،،،

ومين اللي دفنه ؟؟

الملايكة هي اللي دفنته 

فربنا خلي شيث بقي نبي بعد آدم..

وبقي يعلم الناس الخير وطاعة ربنا. ويعلمهم الصح والغلط  والحلال والحرام  

وبعد سنة من موت سيدنا آدم ماتت كمان حواء ..

شيث بني الكعبة بالحجارة " الطوب " والطين ،، وفضل يعمل حج وعمره كتيييير في مكة ..

كان شيث وقومه ساكنين في الجبال ،،

يعني أية قومه ؟

يعني الناس اللي بتسمع كلامه وكلام ربنا اللي علمهوله وسيدنا آدم علمهوله ..

وقابيل وقومه ساكنين في السهول ،، 

 شيث قال لقومه أنه ميختلطوش بقوم أخوه قابيل ،، وميقربوش منهم خالص ..

بس يا تري بقي هيسمعوا كلام شيث ولالا !!

هو قوم سيدنا شيث هيكلم قوم قابيل ولا هيسمعوا كلام شيث بقي !!؟

سيدنا شيث بعد موت سيدنا ءادم فضل يقول للناس أنهم يسمعوا كلام ربنا ويعملوا اى حاجة يقول عليها ربنا 

والناس كانوا بيسمعوا كلام ربنا كله  وماكنوش بيعبدوا اى حاجة تانية غير ربنا 

سيدنا شيث كان عنده ولد صالح ومؤمن اسمه ايييية !؟

اسمه " أنوش " 

سيدنا شيث قبل ما يموت وصي أنوش وصية وقاله :

لما أموت علم الناس الخير وابعدهم عن الشر ..

وعلمهم الحلال والحرام ،، وعلمهم ازاي يسمعوا كلام ربنا 

سيدنا شيث عمل مع أنوش زي ما سيدنا آدم عمل معاه بالظبط ..!

ومات سيدنا شيث بعدها ..

وكان عنده كام سنة ؟؟

كان عنده 912 سنة ..! 

بعد ما مات سيدنا شيث ،، فضلوا الناس يسمعوا كلام أنوش .. 

وقالوا محدش هيقرب من قابيل والناس اللي معاه ولا يكلمهم زي ما سيدنا شيث وأنوش قالولهم ..

هو أنوش كان نبي برضو ؟؟

لأ مكنش نبي ،، أنوش كان بيعمل بوصيه أبوه شيث وجده سيدنا آدم أنه يعلم الناس الصح والغلط ، لحد ما ربنا هو اللي يختار مين النبي اللي هيجي بعده ..

أنوش كان عنده أولاد ..

اسمهم ايه !؟؟

اسمهم " قينان " ،،، و " مهلاييل " ،،،، و " يرد " ،،، و " إدريس " 

أنوش قبل ما يموت هيوصي أولاده بنفس وصية سيدنا شيث وسيدنا آدم ،، 

لحد في يوم من الايام .. واحد من عند سيدنا شيث سمع صوت احتفالات وزمامير من عند قابيل 

ف راح من بعيييد يبص عليهم ويشوف فيه أية عندهم ،، لقي بنات كتييييير متجمعين ..

فضل يقرب شوية عشان يبص علي البنات 

لقي بنات شكلها جمييل اوي ،، ولابسين هدوم قصيرة  وبيرقصوا 

شاف بنات مش زي البنات الي عندهم في الجبال ..!

طبعا البنات اللي في الجبال ماكنوش بيلبسوا هدوم قصيرة ولا يرقصوا عشان بيسمعوا كلام ربنا ومينفعش يعملوا حاجه تزعل ربنا 

فرجع الراجل بسرعة للجبال وقالهم الحقوا الحقوا ،، 

انا شوفت بنات جميلة اوي عند قوم قابيل ،، بيرقصوا ويحتفلوا ولابسين قصير 

واحد منهم عجبه الكلام أوي ، ونسي كلام سيدنا شيث وأنوش ..

وراح هو كمان عشان يتفرج على البنات اللي هناك 

فرجع قالهم بقي البنات هناك جميلة اوي  أحلي من البنات اللي عندنا ..

البنات اللي عند قابيل كانوا اجمل من اللي عند أنوش ..

والرجالة اللي عند أنوش كانوا اجمل من الرجالة اللي عند قابيل .!

فضلوا كل شوية واحد ورا واحد يروح عند قابيل عشان يتفرج علي البنات ..

لحد ما البنات اللي هناك شافوهم وهما عمالين يتفرجوا عليهم 

البنات أعجبت أوي بالرجاله اللي كانوا كل شوية يجوا يتفرجوا عليهم 

وقعدوا يقولوا لبعض الرجاله دي جميلة اوي أجمل من الرجال اللي عندنا ..

وفي مرة من المرات بدأوا البنات يتكلموا مع الرجالة ويختلطوا ببعض ونسيوا كلام سيدنا شيث وأنوش 

فضل الاختلاط كل يوم يزيد بين القومين.،، لحد ما حصل بينهم " زني " 

وكانت أول مرة يحصل زني في تاريخ الإسلام !!

 بدأ عدد الناس اللي من عند شيث يقل ويروح عند قابيل ..

لحد ما انتشر الفساد اكتر وبقوا يقتلوا بعض ويعملوا كل حاجة تعصي ربنا 

بس تفتكري ربنا هيسيبهم وحشين كدة ؟؟

لأ طبعا 

ربنا هيبعتلهم نبي ،، عشان يقولهم عن الحلال والحرام ويخليهم يرجعوا يسمعوا كلام ربنا تاني ،، بس يا تري بقي مين النبي ده؟ 

ده اللي هنعرفه القصة الجاية

#هبه_الله

لمتابعة باقي القصص تابعنا هنا

https://t.me/esraa_Fayez