الجزء الثاني من قصص رمضان، الحلقة الخامسة والعشرون (سيدنا موسى 5)

هو إزاي سيدنا موسي عارف ان هارون ده اخوه وهو مكنش عايش مع أهله اصلا !؟

= واحدة واحدة كده ،، هو مش سيدنا موسي اتولد في السنة اللي الأطفال هيتقتلوا فيها ؟

اه ..

ومش ام سيدنا موسي خافت عليه ف حطيته ف تابوت ورميته في النيل زي ما ربنا أوحي ليها ؟ 

اه

ومش اخت سيدنا موسي مشت ورا التابوت لحد ما وصل قصر فرعون وعرفت أنهم محتاجين مرضعة وقالتلهم علي أمها ترضعه ؟

اه

وكان وقتها بقي أن المرضعات تاخد الأطفال في بيتها ترضعهم ..

صح..

يعني سيدنا موسي اتربي سنتين في بيت أهله صح كدة ؟

صح

وهارون بقي كان اكبر من سيدنا موسي .. يعني شاف سيدنا موسي و عرفه كويس صح ؟

صح

يبقي لما يكبروا بقي مش هيعرفوا بعض 

اكيد واحد فيهم عرف التاني ..

لأ الاتنين كانوا عارفين ،، اقولك الدليل 

بدليل ان سيدنا موسي طلب من ربنا هارون اخوه يكون معاه ..

يبقي كدة عارفه ولا مش عارفه 

عارفه يا كبير .!

وحصل إيه بعد لما قابلوا بعض بقى

وصل سيدنا موسى مع أخوه هارون لمصر وإبتدت بقي المعركة ..

وصلوا مصر وراحوا عند القصر ،، 

شافوهم الجنود ...حصل قلق ...ابن فرعون رجع .

فضل الخبر يتنقل لحد ما وصل الخبر لفرعون وكان قاعد مع وُزراؤه!

قعد مستني عشان يشوف إيه إللي رجّع موسى بعد السنين دي كلها!!

دخل سيدنا موسى وهارون عليهما السلام على فرعون،

أول ما شافه فرعون قال له :

مش إنت إللي ربِّيناك لما كنت صغير وكبَّرناك

"أَلَمْ نُرَبِّكَ فِينَا وَلِيدًا وَلَبِثْتَ فِينَا مِنْ عُمُرِكَ سِنِينَ"

وفي الاخر محفظتش الجميل وعملت عملتك الرهيبة إللي من شدتها مش قادر أقول هي إيه!!!!

"وَفَعَلْتَ فَعْلَتَكَ الَّتِي فَعَلْتَ وَأَنْتَ مِنَ الْكَافِرِينَ"

سيدنا موسى عشان يقفل الحوار ده خالص كلمه بكل أدب 

وقاله أيوة أنا عملت كده قبل ما ينزل علياّ وحي من رب العالمين وأنا كنت لسه جاهل بحكم الأمر ده، وهربت عشان كنت خايف منكم تقتلوني بذنبه إن أنا مكنش قصدي أقتل، وربنا جعلني رسول بعد السنين دي كلها 

"فَفَرَرْتُ مِنْكُمْ لَمَّا خِفْتُكُمْ فَوَهَبَ لِي رَبِّي حُكْمًا وَجَعَلَنِي مِنَ الْمُرْسَلِينَ"

ثم إنت بتمنّ عليّا بإيه بالظبط!!!

هو أنا إيه اللي خلاني أتربّى في قصرك أصلا غير إنك كنت مستعبد بني إسرائيل وكنت بتقتل الأطفال الصغيرين!!

وأنا فَلَتّ من القتل بتدبير ربنا مع كرهك لده طول الوقت.!!

"وَتِلْكَ نِعْمَةٌ تَمُنُّهَا عَلَيَّ أَنْ عَبَّدْتَ بَنِي إِسْرَائِيلَ"

وسيدنا موسي ماكنش قلقان وهو بيكلمه !؟

= لأ كان قلقان ان فرعون مايسمعش كلامه ويقتله قبل ما يكلمه عن ربنا وعن معجزاته .. 

كان خايف إن يحصل اى حاجة قبل ما يبلغ بالرسالات اللي ربنا أمره بيها ..

" قَالَا رَبَّنَا إِنَّنَا نَخَافُ أَن يَفْرُطَ عَلَيْنَا أَوْ أَن يَطْغَى" 

فرعون لما حس إنه اتزنق ومبقاش عارف يرد راح مغيّر الموضوع وقال لموسى: "وما ربُّ العالمين"؟!

هو مين رب العالمين ده إللي إنت بتقول عليه!!

فبدأ سيدنا موسى يِعرض رسالته إللي هو جاي عشانها أصلا.

قال له رب العالمين هو إللي خلق السماوات والأرض وما بينهما، وأنا رسول من رب العالمين ده.

"قَالَ رَبُّ السَّمَاوَاتِ وَالْأَرْضِ وَمَا بَيْنَهُمَا ۖ إِن كُنتُم مُّوقِنِينَ"

جايلك برسالة منه إنك تسيب بني إسرائيل وتحررهم ومتعذبهمش، أنا هاخدهم كلهم ونطلع من البلد.!

"إِنَّا رَسُولَا رَبِّكَ فَأَرْسِلْ مَعَنَا بَنِي إِسْرَائِيلَ وَلَا تُعَذِّبْهُمْ"

وأنا لإني رسول من عند ربنا فأنا لا يمكن أنقل عنه عز وجل إلا الصدق والحق..

"حَقِيقٌ عَلَىٰ أَن لَّا أَقُولَ عَلَى اللَّهِ إِلَّا الْحَقَّ"

 فرعون فضل يبص للي حواليه وقال بمنتهى الإستهزاء والسخرية ،، بصوا بصوا بيقول ايه هاهاهاها 

" قَالَ لِمَنْ حَوْلَهُ أَلَا تَسْتَمِعُونَ" 

سيدنا موسى تجاهل السخرية وكمل كلامه ..

" قَالَ رَبُّكُمْ وَرَبُّ آبَائِكُمُ الْأَوَّلِين"

سيدنا موسي قاله .. ربنا هو إللي وهب كل مخلوق من خَلْقه إللي يصلُح له وينصلح عليه حاله،، 

وعطى للإنسان ما يخصه وعطى للحيوان ما يخصه،، ...

"قَالَ رَبُّنَا الَّذِي أَعْطَى كُلَّ شَيْءٍ خَلْقَهُ ثُمَّ هَدَى"

 فرعون قاله .. طيب والقرون الأولى إيه نظامهم

يعني الناس السابقين معبدوش ربنا زي مانت بتقول ليه

 "قَالَ فَمَا بَالُ الْقُرُونِ الْأُولَى"

رد موسى .. 

ربنا عالم بأعمالهم وهيجازيهم عليها ، وربنا مُحصي لكل شيء في كتابه وكل إنسان هيتجازى بكل إللي عمله سواء الفعل كان صغير أو كبير..

"قَالَ عِلْمُهَا عِنْدَ رَبِّي فِي كِتَابٍ لا يَضِلُّ رَبِّي وَلا يَنْسَى"

فرعون لما ملقاش رد مُقنع على كلام موسى عليه السلام وحس إنه فعلا وصل لحيطة سد ومبقاش نافع إللي بيعمله، بدأ يتعدى عليه بالكلام 

ويشكك اتباع سيدنا موسي أنه مجنون وبيقول اى كلام عشان محدش يصدقه !!

"قَالَ إِنَّ رَسُولَكُمُ الَّذِي أُرْسِلَ إِلَيْكُمْ لَمَجْنُونٌ"

سيدنا موسى ما إهتمش بالإتهام وتجاوز عن السخرية دي وكان كل همه يعرّفهم بعظمة ربهم.. فكمل كلامه.

 " قَالَ رَبُّ الْمَشْرِقِ وَالْمَغْرِبِ وَمَا بَيْنَهُمَا إِن كُنتُمْ تَعْقِلُونَ" 

سيدنا موسى حاول يلفت نظر فرعون لآيات الله في الكون ..

كلّمه عن حركة الرياح وإرسال المطر وإخراج النبات وصولاُ إلى الأرض .. فهمّه إن الأرض دي هي بداية خلق الانسان 

ربنا اخرجنا منها وهيرجعنا فيها ،، وهنبعث من جديد للحساب ..

" الَّذِي جَعَلَ لَكُمُ الْأَرْضَ مَهْدًا وَسَلَكَ لَكُمْ فِيهَا سُبُلًا وَأَنزَلَ مِنَ السَّمَاء مَاء فَأَخْرَجْنَا بِهِ أَزْوَاجًا مِّن نَّبَاتٍ شَتَّى ﴿53﴾ كُلُوا وَارْعَوْا أَنْعَامَكُمْ إِنَّ فِي ذَلِكَ لَآيَاتٍ لِّأُوْلِي النُّهَى ﴿54﴾ مِنْهَا خَلَقْنَاكُمْ وَفِيهَا نُعِيدُكُمْ وَمِنْهَا نُخْرِجُكُمْ تَارَةً أُخْرَى"

الكلام ده مفروض كان يطمّن فرعون ويخليه يركز في مصيره هو ومايقارنش نفسه بحد لإنه هيتحاسب لوحده , زي ماغيره هيتحاسب عن نفسه بس .. لكن فرعون ماكنش بيسأل ويجادل موسي من باب المعرفة بربنا , 

دة كان مُكابر وبيسأل من باب التعجيز مش اكثر ..!

يا تري هيكمل مجادله ولا هيقتله ويخلص صبره ولا هيعمل اية تاني !!

#سيدنا_موسى ٥

#قصص_الأنبياء_بالعامية 

#هبةُ_الله