نبي الله موسى (الجزء الثالث)

إيه ده ثانية واحدة كدة !!

= إيه

هو إزاي سيدنا موسي عارف ان هارون دة اخوه وهو مكنش عايش مع أهله اصلا !؟

= واحدة واحدة كدة ،، هو مش سيدنا موسي اتولد في السنة اللي الأطفال هيتقتلوا فيها ؟

اة ..

ومش ام سيدنا موسي خافت عليه ف حطيته ف تابوت ورميته في النيل زي ما ربنا أوحي ليها ؟ 

اة

ومش اخت سيدنا موسي مشت ورا التابوت لحد ما وصل قصر فرعون وعرفت أنهم محتاجين مرضعة وقالتلهم علي أمها ترضعه ؟

اة 

وكان وقتها بقي أن المرضعات تاخد الأطفال في بيتها ترضعهم ..

صح..

يعني سيدنا موسي اتربي سنتين في بيت أهله صح كدة ؟

صح

وهارون بقي كان اكبر من سيدنا موسي .. يعني شاف سيدنا موسي و عرفه كويس صح ؟. 

صح

يبقي لما يكبروا بقي مش هيعرفوا بعض 

اكيد واحد فيهم عرف التاني ..

لأ الاتنين كانوا عارفين ،، اقولك الدليل 

بدليل ان سيدنا موسي طلب من ربنا هارون اخوه يكون معاه ..

يبقي كدة عارفه ولا مش عارفه 

عارفه يا كبير .!

وحصل إيه بعد لما قابلوا بعض بقي 

وصل سيدنا موسى مع أخوه هارون لمصر وإبتدت بقي المعركة ..

وصلوا مصر وراحوا عند القصر ،، 

 شافوهم الجنود ...حصل قلق ...ابن فرعون رجع .

فضل الخبر يتنقل لحد ما وصل الخبر لفرعون وكان قاعد مع وُزراؤه!

قعد مستني عشان يشوف إيه إللي رجّع موسى بعد السنين دي كلها!!

دخل سيدنا موسى وهارون عليهما السلام على فرعون،

أول ما شافه فرعون قال له :

مش إنت إللي ربِّيناك لما كنت صغير وكبَّرناك

"أَلَمْ نُرَبِّكَ فِينَا وَلِيدًا وَلَبِثْتَ فِينَا مِنْ عُمُرِكَ سِنِينَ"

وفي الاخر محفظتش الجميل وعملت عملتك الرهيبة إللي من شدتها مش قادر أقول هي إيه!!!!

.وهربت بعملتك دي سنين بكل جحود منك وكفران لنعمتي عليك 

"وَفَعَلْتَ فَعْلَتَكَ الَّتِي فَعَلْتَ وَأَنْتَ مِنَ الْكَافِرِينَ"

سيدنا موسى عشان يقفل الحوار ده خالص كلمه بكل أدب 

وقُولا له قوْلاً لينا"

وقاله؛:

   أيوة أنا عملت كده قبل ما ينزل علياّ وحي من رب العالمين وأنا كنت لسه جاهل بحكم الأمر ده،،

 وهربت عشان كنت خايف منكم تقتلوني بذنبه إن أنا مكنش قصدي أقتل،،

 وربنا جعلني رسول بعد السنين دي كلها

"فَفَرَرْتُ مِنْكُمْ لَمَّا خِفْتُكُمْ فَوَهَبَ لِي رَبِّي حُكْمًا وَجَعَلَنِي مِنَ الْمُرْسَلِينَ"

ثم إنت بتمنّ عليّا بإيه بالظبط!!!

هو أنا إيه اللي خلاني أتربّى في قصرك أصلا غير إنك كنت مستعبد بني إسرائيل وكنت بتقتل الأطفال الصغيرين!!

 وأنا فَلَتّ من القتل بتدبير ربنا مع كرهك لده طول الوقت.!!

"وَتِلْكَ نِعْمَةٌ تَمُنُّهَا عَلَيَّ أَنْ عَبَّدْتَ بَنِي إِسْرَائِيلَ"

وسيدنا موسي ماكنش قلقان وهو بيكلمه !؟

= لأ كان قلقان ان فرعون مايسمعش كلامه ويقتله قبل ما يكلمه عن ربنا وعن معجزاته .. 

كان خايف إن يحصل اى حاجة قبل ما يبلغ بالرسالات اللي ربنا أمره بيها ..

قَالَا رَبَّنَا إِنَّنَا نَخَافُ أَن يَفْرُطَ عَلَيْنَا أَوْ أَن يَطْغَى 

فرعون لما حس إنه اتزنق ومبقاش عارف يرد راح مغيّر الموضوع وقال لموسى:

"وما ربُّ العالمين"؟!

هو مين رب العالمين ده إللي إنت بتقول عليه!!

فبدأ سيدنا موسى يِعرض رسالته إللي هو جاي عشانها أصلا.

قال له رب العالمين هو إللي خلق السماوات والأرض وما بينهما، وأنا رسول من رب العالمين ده.

"قَالَ رَبُّ السَّمَاوَاتِ وَالْأَرْضِ وَمَا بَيْنَهُمَا ۖ إِن كُنتُم مُّوقِنِينَ"

جايلك برسالة منه إنك تسيب بني إسرائيل وتحررهم ومتعذبهمش، أنا هاخدهم كلهم ونطلع من البلد.!

"إِنَّا رَسُولَا رَبِّكَ فَأَرْسِلْ مَعَنَا بَنِي إِسْرَائِيلَ وَلَا تُعَذِّبْهُمْ"

وأنا لإني رسول من عند ربنا فأنا لا يمكن أنقل عنه عز وجل إلا الصدق والحق..

"حَقِيقٌ عَلَىٰ أَن لَّا أَقُولَ عَلَى اللَّهِ إِلَّا الْحَقَّ"

 فرعون فضل يبص للي حواليه وقال بمنتهى الإستهزاء والسخرية ،، بصوا بصوا بيقول ايه هاهاهاها 

 قَالَ لِمَنْ حَوْلَهُ أَلَا تَسْتَمِعُونَ

سيدنا موسى تجاهل السخرية وكمل كلامه ..

 قَالَ رَبُّكُمْ وَرَبُّ آبَائِكُمُ الْأَوَّلِين

سيدنا موسي قاله .. ربنا هو إللي وهب كل مخلوق من خَلْقه إللي يصلُح له وينصلح عليه حاله،، 

وعطى للإنسان ما يخصه وعطى للحيوان ما يخصه،، ...

"قَالَ رَبُّنَا الَّذِي أَعْطَى كُلَّ شَيْءٍ خَلْقَهُ ثُمَّ هَدَى"

 فرعون قاله ..

 طيب والقرون الأولى إيه نظامهم

يعني الناس السابقين معبدوش ربنا زي مانت بتقول ليه

 "قَالَ فَمَا بَالُ الْقُرُونِ الْأُولَى"

رد موسى .. 

ربنا عالم بأعمالهم وهيجازيهم عليها ، وربنا مُحصي لكل شيء في كتابه وكل إنسان هيتجازى بكل إللي عمله سواء الفعل كان صغير أو كبير..

"قَالَ عِلْمُهَا عِنْدَ رَبِّي فِي كِتَابٍ لا يَضِلُّ رَبِّي وَلا يَنْسَى"

فرعون لما ملقاش رد مُقنع على كلام موسى عليه السلام وحس إنه فعلا وصل لحيطة سد ومبقاش نافع إللي بيعمله، بدأ يتعدى عليه بالكلام 

ويشكك اتباع سيدنا موسي أنه مجنون وبيقول اى كلام عشان محدش يصدقه !!

"قَالَ إِنَّ رَسُولَكُمُ الَّذِي أُرْسِلَ إِلَيْكُمْ لَمَجْنُونٌ"

سيدنا موسى ما إهتمش بالإتهام وتجاوز عن السخرية دي وكان كل همه يعرّفهم بعظمة ربهم..

 فكمل كلامه.

  قَالَ رَبُّ الْمَشْرِقِ وَالْمَغْرِبِ وَمَا بَيْنَهُمَا إِن كُنتُمْ تَعْقِلُونَ 

سيدنا موسى حاول يلفت نظر فرعون لآيات الله في الكون ..

 كلّمه عن حركة الرياح وإرسال المطر وإخراج النبات وصولاُ إلى الأرض ..

 فهمّه إن الأرض دي هي بداية خلق الانسان 

ربنا اخرجنا منها وهيرجعنا فيها ،، وهنبعث من جديد للحساب ..

 (الَّذِي جَعَلَ لَكُمُ الْأَرْضَ مَهْدًا وَسَلَكَ لَكُمْ فِيهَا سُبُلًا وَأَنزَلَ مِنَ السَّمَاء مَاء فَأَخْرَجْنَا بِهِ أَزْوَاجًا مِّن نَّبَاتٍ شَتَّى ﴿53﴾ كُلُوا وَارْعَوْا أَنْعَامَكُمْ إِنَّ فِي ذَلِكَ لَآيَاتٍ لِّأُوْلِي النُّهَى ﴿54﴾ مِنْهَا خَلَقْنَاكُمْ وَفِيهَا نُعِيدُكُمْ وَمِنْهَا نُخْرِجُكُمْ تَارَةً أُخْرَى

الكلام ده مفروض كان يطمّن فرعون ويخليه يركز في مصيره هو ومايقارنش نفسه بحد لإنه هيتحاسب لوحده , زي ماغيره هيتحاسب عن نفسه بس ..

 لكن فرعون ماكنش بيسأل ويجادل موسي من باب المعرفة بربنا , 

دة كان مُكابر وبيسأل من باب التعجيز مش اكثر ..!

يا تري هيكمل مجادله ولا هيقتله ويخلص صبره ولا هيعمل ايه تاني !!

بصوا بقي مش مصر دي ملكي أنا؟ 

والأنهار إللي بتجري من تحت قصري دي بتاعة مين؟ 

مش بتاعتي أنا ..!!!!

مش أنا اللي بقول كده ،،، دة فرعون هو اللي بيقول 

"أَلَيْسَ لِي مُلْكُ مِصْرَ وَهَٰذِهِ الْأَنْهَارُ تَجْرِي مِن تَحْتِي"

وقال كدة لية ؟؟

دة لما معرفش يرد علي سيدنا موسي لما كان بيكلمه علي ربنا ،، فقعد يقول تخاريف وأي كلام !

وكمان بقي قال إيه

= إيه

نادي علي قائد الجنود بتوعوه وقاله :

يا هامان ابني لي برج عالي عشان أطْلَع عليه فوق لحد السما أشوف إله موسى ده يطلع إيه بالظبط!

"يَا هَامَانُ ابْنِ لِي صَرْحًا لَّعَلِّي أَبْلُغُ الْأَسْبَابَ .. أَسْبَابَ السَّمَاوَاتِ فَأَطَّلِعَ إِلَىٰ إِلَٰهِ مُوسَىٰ وَإِنِّي لَأَظُنُّهُ كَاذِبًا ۚ"

وسيدنا موسي رد عليه 

برغم كل ده سيدنا موسى مهتمش أصلا بكلامه ده واستمر في تبليغ رسالته للحاضرين،فكمل كلامه وقال:

" إن ربنا هو خالق المشرق والمغرب،

وهو إللي مهّد الأرض وخلق فيها البحار والأنهار، لو كنتم بتفكروا وعندكم عقل يعني 

قَالَ رَبُّ الْمَشْرِقِ وَالْمَغْرِبِ وَمَا بَيْنَهُمَا ۖ إِن كُنتُمْ تَعْقِلُون

 فرعون بقي مش عارف يرد ولا ينطق وخلاص جاب آخره فعلا.!

فراح مستعمل سلاح القوة ودي حيلة الظلمة والطغاة في كل عصر،،

اللي أول ما يحس انه اتزنق ومش عارف يرد يستعمل منطق القوة،.والتهديد !!

 قال:

لو عبدت إله تاني غيري أنا هسجنك.

"قَالَ لَئِنِ اتَّخَذْتَ إِلَٰهًا غَيْرِي لَأَجْعَلَنَّكَ مِنَ الْمَسْجُونِينَ"

 سيدنا موسى استغل الفرصة

 و إبتدا يغيّر اسلوب الحوار ويحاول يقنعه بطريقة جديدة ..فقاله

طب ولو أنا جبتلك دليل على إني فعلا رسول؟!

قَالَ أَوَلَوْ جِئْتُكَ بِشَيْءٍ مُّبِينٍ "

فرعون لو رفض التحدّي هيبان إنه خايف ف هيفقد ثقة كل الشهود الي واقفين وسامعين الحوار ..

فإضطر يوافق ،، فرد فرعون وقال له:

طيب وريني كده لو انت فعلا صادق

"فَأْتِ بِهِ إِن كُنتَ مِنَ الصَّادِقِينَ"

سيدنا موسي رمى العصا بتاعته فاتحولت لثعبان بيتحرك.!!

"فَأَلْقَى عَصَاهُ فَإِذَا هِيَ ثُعْبَانٌ مُبِينٌ"

طبعا كل إللي في القصر اتفزعوا.

لسه مالحقوش يستوعبوا الموقف كان سيدنا موسى بادر بالمعجزة التانية فوراً!!

راح ماسك الثعبان، فاتحول لعصا تاني.. والناس مذهولة.

وبعدين دخل إيده في جيبه وخرّجها طلعت لونها أبيض لامع زي البرق! 

" وَنَزَعَ يَدَهُ فَإِذَا هِيَ بَيْضَاءُ لِلنَّاظِرِينَ"

سيدنا موسى أصلا كانت بشرته سمراء وبعدين دخلها تاني وخرجها فرجعت للونها الطبيعي الأسمر!

الناس كانت واقفه منبهرة م اللي بيحصل دة !

لكن طبعا لما فرعون شاف معجزات موسى عمل إييييه!

قاله ده سِحر يعني 

(فَلَمَّا جَاءهُم مُّوسَى بِآيَاتِنَا بَيِّنَاتٍ قَالُوا مَا هَذَا إِلَّا سِحْرٌ مُّفْتَرًى 

سيدنا موسى إستنكر عليهم التكذيب رغم المعجزتين اللي حصلوا والإحساس الغريب الي حد ممكن يحسه لما يشوف اللي سيدنا موسي عمله !!

ف سيدنا موسي قالهم ؛

انتوا بتكدبوا الحقيقه و بتقولوا عليها سحر !! 

 ( قَالَ مُوسَى أَتقُولُونَ لِلْحَقِّ لَمَّا جَاءكُمْ أَسِحْرٌ هَـذَا 

فرعون كان عايز يلهي الناس عن كلامه .. ف بدأ يسخنهم ..

فرعون قال ل موسي اه دة سحر واحنا هنقدر نجيبلك سِحر زيه ..مش حاجة صعبة يعني

"فَلَنَأْتِيَنَّكَ بِسِحْرٍ مِّثْلِهِ "

أول ما فرعون حس بالخطر على مُلكه وسلطته .. فبقي ياخد رأي الناس الموجودين 

موسى ده ساحر،،

 وعايز يطلعكم من أرضكم ويفسد في الأرض، إيه رأيكم في الكلام ده...نعمل إيه وتؤمروا بإيه

"قَالَ لِلْمَلَإِ حَوْلَهُ إِنَّ هَٰذَا لَسَاحِرٌ عَلِيمٌ* يُرِيدُ أَن يُخْرِجَكُم مِّنْ أَرْضِكُم بِسِحْرِهِ فَمَاذَا تَأْمُرُونَ "

فالناس قالوله خلاص أجّل الموضوع ده وهنبعت رسايل لكل كبار السحرة إللي في البلد ييجوا عشان يواجهوا سحر موسى بسحر زيه ..

قَالُوا أَرْجِهْ وَأَخَاهُ وَابْعَثْ فِي الْمَدَائِنِ حَاشِرِينَ * يَأْتُوكَ بِكُلِّ سَحَّارٍ عَلِيمٍ"

بني اسرائيل حسوا بإحراج كبير ومابقوش عارفين يستغلوا الفرصة الي فرعون ومستشارينه بيتفضّلوا عليهم بيها ..

 ولا يصدقوا عيونهم وعقولهم بعد المُعجزتين الي شافوهم ولسه مأثرين عليهم ..

فلجأوا لحل ذكي يخرّجهم من الموقف ده .. 

واقترحوا عليه يأجل الموضوع ده لحد ما ياخدوا –الرأي العام – .. 

كان الإقتراح بإنهم يحددوا يوم يكرر فيه موسى الي عمله قدام كل الناس .. 

فيبقى الحكم متشاف ومسموع من كل الحكام ..

 الفكرة أقنعت كل الموجودين .. حتي فرعون نفسه اقتنع !

فأيدوها بس زود عليها إن التحدّي يكون من الطرفين عشان الناس لو شافوا سحر موسى لوحده ممكن يتأثروا بيه أو يميلوا ليه ..

 نجيب إحنا كمان أحسن سحرة عندنا ونحارب السحر بالسحر .. فيكون رأي الموجودين في النهاية عادل ومُنصف لنا ..

فرعون قال لسيدنا موسي اختار ميعاد ومكان معلومين عشان محدش فينا يتخلف عنه،، 

ويكون في مكان وَسَط بين الفريقين من حيث المسافة. يعني ..

فَاجْعَلْ بَيْنَنَا وَبَيْنَكَ مَوْعِدًا لَّا نُخْلِفُهُ نَحْنُ وَلَا أَنتَ مَكَانًا سُوًى )

سيدنا موسى شاف إن الموضوع فرصة عشان تبقى الدعوة علناً، فقال لهم: 

الميعاد هيكون يوم العيد، واجمعوا الناس كمان عشان يشوفوا الفريقين، ونتقابل هناك في وقت الضحى.

قَالَ مَوْعِدُكُمْ يَوْمُ الزِّينَةِ وَأَن يُحْشَرَ النَّاسُ ضُحًى"

معلش عندي سؤال محيرني.!! 

 وهو فرعون مقتلش موسى وخلص نفسه، ليه كل ده.

لأن لو كان عمل كده كانت الناس هتقول إن فرعون خايف من موسى،، 

وهيحصل قلق هو في غِنى عنه دلوقتي لإنه في أضعف أوقاته،،

 فهو اعتقد إن الأحسن إنه يجيب السحرة ويكذّبوا موسى قصاد الناس كلهم،،

وساعتها هيبقى له كل الحق إنه يقتله بتفويض من الناس ..ومحدش هيعترض!!

وجه اليوم الموعود ،!! 

يوم الزينة .. يوم إحتفال عظيم

وجمعوا كل السحرة اللي في البلد ،، وهما بيغلبوا موسى اللي بيدعو لدين جديد وبيدّعي المعجزات..

السحرة بقى لقوها فرصة فقالوا لفرعون:

 لو احنا غلبنا هتدينا مكافأة وأجر كبير.

"وَجَاءَ السَّحَرَةُ فِرْعَوْنَ قَالُوا إِنَّ لَنَا لَأَجْرًا إِنْ كُنَّا نَحْنُ الْغَالِبِينَ"

فقال لهم:

مش بس أجر ومكافأة، لأ ده انتم هتكونوا من المقربين مني ..

"قَالَ نَعَمْ وَإِنَّكُمْ لَمِنَ الْمُقَرَّبِينَ"

فبدأ العرض، واتوجهوا ناحية موسى وبدأوا يكلموه: قالوله

إما تبدأ انت بإلقاء سحرك يا إما احنا إللي نبدأ

"قَالُوا يَا مُوسَىٰ إِمَّا أَن تُلْقِيَ وَإِمَّا أَن نَّكُونَ أَوَّلَ مَنْ أَلْقَىٰ "

سيدنا موسي اختار إنهم همّ اللي يبدأوا.. 

"قَالَ بَلْ أَلْقُوا"

رمى السحرة الحبال والعصيان إللي معاهم وأقسموا وهمّ بيرموها وقالوا:

بعزة فرعون إحنا إللي هنغلب موسى النهاردة 

"فَأَلْقَوْا حِبَالَهُمْ وَعِصِيَّهُمْ وَقَالُوا بِعِزَّةِ فِرْعَوْنَ إِنَّا لَنَحْنُ الْغَالِبُونَ"

بس بعد ما رموا العصا عملوا حاجة عجيبة جداااا !!!!

يا تري السحرة هيعملوا إيه

يتبع إن شاء الله......

#هبةُ_الله